10 dekabr 2025-ci il tarixində Xətai Rayon İcra Hakimiyyətinin və YAP Xətai rayon təşkilatının birgə təşkilatçılığı ilə “Konstitusiya və Suverenlik İli” çərçivəsində “Vətənə, xalqa həsr edilən şərəfli ömür” adlı tədbir keçirilib.
"DogruXeber.tv" qeyd edir ki, tədbirdə Xətai Rayon İcra Hakimiyyətinin başçısı Rafiq Quluyev, YAP Xətai rayon təşkilatının sədri Ramil Mirzəyev, YAP Veteranlar Şurasının üzvü Əli Həsənov, YAP İdarə Heyətinin üzvü, millət vəkili Mixail Zabelin, Milli Məclisin İnsan hüquqları komitəsinin sədri Zahid Oruc, millət vəkilləri Pərvanə Vəliyeva və Vüqar Rəhimzadə iştirak ediblər.
Tədbir iştirakçıları əvvəlcə Ulu Öndər Heydər Əliyevin büstünü ziyarət edərək önünə gül dəstələri düzüblər.
Xalqımızın Ümummilli Lideri, müstəqil və müasir Azərbaycanın memarı Heydər Əliyevin, həmçinin ölkəmizin ərazi bütövlüyü uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə tədbir başlanıb.
Tədbiri giriş sözü ilə YAP Xətai rayon təşkilatının sədri Ramil Mirzəyev açaraq Ulu Öndər Heydər Əliyevin Azərbaycan dövlətçiliyi qarşısında misilsiz xidmətlərindən danışıb. Ümummilli lider Heydər Əliyevin dahi şəxsiyyət və dünya siyasət akademiyasının bilicilərindən olduğunu diqqətə çatdıran Ramil Mirzəyev Ulu Öndərin hələ ötən əsrin 70-ci illərində bu gün sürətlə inkişaf edən Azərbaycanın əsasını qoyduğunu qeyd edib. O, Ümummilli Liderin siyasi irsinin bu gün Azərbaycan Respublikasının Prezidenti cənab İlham Əliyev tərəfindən qətiyyətlə və uğurla davam etdirildiyini qeyd edib. Ramil Mirzəyev bildirib ki, 2025-ci ilin “Konstitusiya və Suverenlik İli” elan olunması Heydər Əliyevin dövlətçilik xəttinə və ölkəmizin müstəqil inkişaf strategiyasına olan böyük ehtiramın göstəricisidir.
Xətai Rayon İcra Hakimiyyətinin başçısı Rafiq Quluyev Ulu Öndər Heydər Əliyevin rəhbərliyi ilə əsası qoyulan sabitlik və inkişaf yolunun bu gün də ölkəmizi yeni zirvələrə apardığını bildirib. O, Xətai rayonunda həyata keçirilən sosial layihələr, abadlıq işləri və ictimai təşəbbüslərin Heydər Əliyev ideyalarına uyğun olaraq reallaşdırıldığını vurğulayıb.
YAP Veteranlar Şurasının üzvü Əli Həsənov çıxışında Heydər Əliyevin siyasi məktəbinin dövlət idarəçiliyi üçün misilsiz model olduğunu bildirib. O, Ümummilli Liderin həyat yolunun hər bir azərbaycanlı üçün əsl nümunə olduğunu qeyd edib. Əli Həsənov Ulu öndər Heydər Əliyevin dövlətçiliyin möhkəmləndirilməsi, ölkənin iqtisadi inkişafı, qaçqın və məcburi köçkünlərin yaşayış şəraitinin yaxşılaşdırılması istiqamətində gördüyü işlərdən danışib. O qeyd edib ki, ötən illər ərzində Azərbaycanda böyük dəyişikliklər baş vermiş və ölkə sürətlə inkişaf etmişdir. Bu dəyişikliklərin kökündə dahi şəxsiyyət Heydər Əliyevin müəyyənləşdirdiyi strategiya və həmin strategiyanın bu gün Prezident İlham Əliyev tərəfindən uğurla davam etdirilməsi dayanır.
YAP İdarə Heyətinin üzvü, millət vəkili Mixail Zabelin Heydər Əliyevin qlobal siyasətdə nüfuzundan, Azərbaycanı regional lider dövlətə çevirməklə bağlı gördüyü işlərdən danışıb.
Milli Məclisin İnsan hüquqları komitəsinin sədri, millət vəkili Zahid Oruc çıxışında Heydər Əliyevin insan hüquq və azadlıqlarının qorunması sahəsində həyata keçirdiyi islahatların bu gün də hüquqi dövlət quruculuğunda əsas baza olduğunu vurğulayıb.
Milli Məclisin üzvü Pərvanə Vəliyeva Ulu Öndərin qadınların ictimai-siyasi fəallığının artırılmasında oynadığı rol haqqında danışıb.
Milli Məclisin üzvü Vüqar Rəhimzadə isə Heydər Əliyev siyasətinin informasiya cəmiyyətinin formalaşmasına, media mühitinin inkişafına və milli ideologiyanın möhkəmləndirilməsinə verdiyi töhfələri qeyd edib.
Tədbir Ümummilli Lider Heydər Əliyevin şərəfli və zəngin həyat yolunu, dövlətçiliyə xidmətlərini və müstəqil Azərbaycan naminə göstərdiyi fədakar fəaliyyətini əks etdirən filmin nümayişi ilə başa çatıb.