"DogruXeber.tv" xəbər verir ki, jurnalist Kamal Əsgərov deputat Ceyhun Məmmədov-un gənclərə ünvanladığı paylaşımına şəxsi Facebook hesabında münasibət bildirib. O, statusunda siyasətçilərin gənclərə nəsihət verməzdən əvvəl öz fəaliyyətləri və seçicilərlə münasibətləri barədə düşünmələrinin vacib olduğunu vurğulayıb.

Jurnalist yazır:

"Ceyhun Məmmədov-un gənclərə ünvanladığı bu cür “nəsihət dolu” statusları ilk baxışda sanki mənəviyyat dərsi kimi görünə bilər. Amma insan bir az dayanıb düşünəndə sual yaranır: bu tövsiyələri yazan şəxs özü bu prinsiplərə nə qədər əməl edir?

Gənclərə “ədalətli olun”, “vicdanlı olun”, “dəyərlərinizə sadiq qalın” demək çox asandır. Çətin olan isə həmin sözləri əvvəlcə öz həyatında tətbiq etməkdir. Təəssüf ki, seçiciləri ilə demək olar ki, ünsiyyət qurmayan, onların problemlərini eşitməyən, rayon sakinlərinin dərdindən xəbərsiz olan bir deputatın birdən-birə gənclərə mənəviyyat dərsi keçməsi cəmiyyətdə təbii olaraq suallar doğurur.

Bir rayonun on minlərlə sakini var, amma həmin rayonun deputatını görmək, onunla görüşmək bəzən yüz nəfərdən birinə belə qismət olmur. Halbuki deputatın əsas vəzifəsi efirlərdə çıxış edib nəsihət vermək yox, xalqın problemlərini parlamentdə qaldırmaq, onların hüquqlarını müdafiə etmək və seçicisinin yanında olmaqdır.

Əgər bir siyasətçi günün böyük hissəsini televiziya studiyalarında keçirdib ya “mənəvi moizə” oxuyur, ya da hakimiyyəti tərifləməklə məşğul olursa, o zaman ortaya haqlı bir sual çıxır: bəs seçicilərin problemləri ilə kim məşğul olacaq?

Gənclərə “pisliyə pisliklə cavab verməyin”, “vicdanlı olun” kimi fikirlər demək gözəldir. Amma gənclər bu sözlərin səmimiyyətinə yalnız o zaman inanır ki, həmin sözləri deyən insanın əməli də sözünə uyğun olsun. Əks halda bu cür statuslar nəsihətdən çox ironiyaya çevrilir.

Atalar demişkən: “Utanmasan, oynamağa nə var ki.”

İnsan əvvəlcə güzgüyə baxmalı, sonra başqasına dərs keçməlidir.

Əgər bir deputat doğrudan da gənclərə nümunə olmaq istəyirsə, bunun ən yaxşı yolu sosial şəbəkədə status yazmaq yox, xalqın arasında olmaq, onların problemlərini dinləmək və o problemlərin həlli üçün real addımlar atmaqdır.

Əks halda yazılan uzun-uzadı “nəsihətlər” cəmiyyət üçün deyil, sadəcə kağız üzərində qalan sözlərdən başqa bir şey olmur."