Böyük Britaniyanın baş naziri Kir Starmer rəsmi Londonun İranla hər hansı hərbi münaqişədə maraqlı olmadığını və bu ssenarinin Britaniya iqtisadiyyatı üçün fəlakətli ola biləcəyini vurğulayıb.

DogruXeber.tv xəbər verir ki, baş nazir Kir Starmer ölkəsinin Yaxın Şərqdə artan gərginlik fonunda İranla müharibəyə daxil olmaq niyyətində olmadığını açıqlayıb. Starmer çıxışı zamanı mümkün hərbi qarşıdurmanın Britaniya vətəndaşlarının gündəlik həyatına birbaşa təsir edəcəyini, xüsusilə benzin qiymətlərində kəskin artımın qaçılmaz olacağını bildirib.

Baş nazir qeyd edib ki, müəyyən xarici dairələr və bəzi ölkələr Britaniyanı bu münaqişəyə cəlb etmək üçün diplomatik təzyiqlər göstərir. Lakin Londonun mövqeyi qətidir: Britaniya öz milli maraqlarını və iqtisadi sabitliyini qorumaq üçün hərbi eskalasiyadan kənarda qalacaq.

"Bizim vətəndaşlarımız yaşayış xərclərinin artması və iqtisadi qeyri-müəyyənliklə bağlı narahatdır. İranla müharibə bu problemləri daha da dərinləşdirə bilər. Britaniya bu ssenariyə qoşulmayacaq", - deyə Starmer vurğulayıb. Analitiklər hesab edirlər ki, baş nazirin bu çıxışı Londonun ənənəvi müttəfiqləri ilə hərbi məsələlərdə müəyyən fikir ayrılıqlarının yarandığını göstərir./EDnews