Bakı, Bakıətrafı qəsəbə və kəndlərə elektrik qatarlarının istifadəyə verilməsi ilə əlaqədar artıq Sabunçu stansiyasında təmir işlərinə başlanılıb. Təmir işləri ərazidə yaşayan sakinlərin köçürülməsi məsələsini gündəmə gətirib.

Məsələ ilə əlaqədar "Azərbaycan Dəmir Yolları” Qapalı Səhmdar Cəmiyyətindən Publika.az-ın sorğusuna verilən cavabda bildirilib ki, tikintiyə maneə olan tikililərin sökülməsinə baxıla bilər:

"Təmir işləri çərçivəsində yolların və stansiyada yoldəyişənlərin yenilənməsi, dəmir yolu keçidlərinin (avtomobil yolu ilə kəsişmə) yenidənqurulması, lazımi yerlərdə yerüstü və yeraltı keçidlərin inşası (piyadalar üçün), yolun ətrafının hasarlanması, elektrik təchizatı və işarəvermə ilə rabitənin gücləndirilməsi, stansiyada binaların və platformaların (o cümlədən stansiya olmayan dayanacaqlarda) yenidənqurulması nəzərdə tutulub. Ərazidəki tikinti və digər obyektlər prosesə maneə olub-olmaması ilə bağlı məsələ araşdırılır”.

Qeyd edək ki, fevralın 1-dən qatarların sürətini və intensiv hərəkətini təmin etmək məqsədilə Bakı-Sumqayıt dairəvi dəmir yolunun əsaslı təmirinə start verilib. Ümumi uzunluğu 107 km olan baş yollarda təmir işlərinin sentyabr ayına qədər sonlandırılması planlaşdırılır. Layihə mərhələli şəkildə həyata keçiriləcək. İlkin mərhələdə Sabunçu-Bakı sərnişin stansiyası istiqamətində 14 km yolun sökülməsi və əsaslı təmiri nəzərdə tutulub.

İşlər başa çatandan sonra Bakı, 8-ci km qəsəbəsi, Sabunçu, Zabrat, Pirşağı, Kürdəxanı, Goradil, Saray və Sumqayıt əhalisi elektrik qatarlarının xidmətindən istifadə edərək, mənzil başına rahat və təhlükəsiz şəraitdə çatacaq./xezerxeber.az