İyulun 7-də Ucar rayon Polis Şöbəsinin yeni inzibati binasının açılışı olub.



Daxili İşlər Nazirliyinin mətbuat xdmətindən APA-ya verilən məlumata görə, tədbirdə daxili işlər nazirinin müavini, polis general-leytenantı İsmət Əliyev iştirak edib.



Əvvəlcə şəxsi heyətlə görüşən nazir müavini daxili işlər naziri, general-polkovnik Ramil Usubovun adından onları salamlayıb, ən xoş arzularını çatdırıb. Qeyd olunub ki, Azərbaycan Prezidenti İlham Əliyevin ali diqqət və qayğısı sayəsində daxili işlər orqanlarının maddi-texniki bazasının, əməkdaşların sosial müdafiəsinin gücləndirilməsi, xidmət şəraitinin daha da yaxşılaşıdırılması istiqamətində mühüm işlər görülüb, onlarca yeni obyektlər tikilərək istismara verilib. Nazir müavini deyib ki, Ucar Rayon Polis Şöbəsinin yeni binasının istifadəyə verilməsi də şəxsi heyətə dövlət qayğısının növbəti əyani təzahürüdür. O, əmin olduğunu bildirib ki, əməkdaşlar bu ali diqqət və qayğıya sabitliyin, əmin-amanlığın nümunəvi qorunması və cinayətkarlıqla qətiyyətli mübarizə işinə verdikləri töhfələrilə cavab verəcəklər.



Məlumat verilib ki, 4 mərtəbəli inzibati binanın ümumi sahəsi 2584 kvadratmetrdir. Müasir standartlara uyğun olan binanın bütün otaqları zəruri avadanlıq, inventar və kommunikaslyalarla təchiz edilib, yeməkxana və digər yardımçı sahələr istifadəyə verilib, həyətdə su anbarı tikilib. Yeni tikilidə 55 xidməti otaq, 133 yerlik akt zalı var. Binada havalandırma, mərkəzi istilik sistemi, qazanxana, rabitə-kommunikasiya və elektrik xətləri quraşdırılıb. Ərazi hasarlanıb, abadlaşdırma, yaşıllaşdırma və xarici işıqlandırma işləri yerinə yetirilib.



Çıxış edənlər RPŞ-nin şəxsi heyətinin iş şəraitinin daha da yaxşılaşdırılmasına, fəaliyyətin səmərəliliyinin artırılmasına xidmət edəcək və ən müasir standartlara cavab verən yeni inzibati binaya görə ölkə və DİN rəhbərliyinə minnətdarlıqlarını bildiriblər.



Yeni inzibati binanın açılışında Ucar Rayon İcra Hakimiyyətinin başçısı Mansur Məmmədov iştirak edib.