Yaponiyanın cənubunda güclü “Trami” tufanının yaratdığı kəskin küləklər nəticəsində 47 nəfərin xəsarət aldığı bildirlir.

AZƏRTAC Baş Meteorologiya Agentliyinə istinadla xəbər verir ki, Yaponiyada “24 nömrəli” adlandırılan “Trami” tufanı hazırda Kyuşü adasının Miyakocima şəhərinin 25 kilometr cənub-şərqindədir. Tufanın mərkəzində atmosfer təzyiqi 950 hektapiksel təkşkil edir, küləyin sürəti isə saniyədə 45 metrə çatır. Tufanın gün ərzində Hönşü adasının qərb, mərkəz və şərq rayonlarından keçəcəyi gözlənilir. Tufan nəticəsində Okinava prefekturasında 212 min, Miyazaki prefekturasında isə təqribən 1000 evin elektrik enerjisiz qaldığı bildirilir.

Son məlumatlara görə, ölkənin müxtəlif rayonlarını birləşdirən 940-a yaxın avireys təxirə salınıb. Osaka şəhərində yerləşən “Kansay” aeroportunun iki uçuş-enmə zolağı da yerli vaxtla saat 11:00-dan fəaliyyətini dayandırıb.

Tufanın keçəcəyi ərazilərə sutka ərzində 500 milllimetrədək yağıntı düşəcəyi gözlənilir. Kyuşü adasına 350 millimetr, Kinqi regionunun Osaka, Kioto və Kobe şəhərlərinə 450 milllimetr, mərkəzi və qərb rayonlarına isə 250-300 millimetr yağıntı düşəcəyi proqnozlaşdırılır.

Mütəxəssislər dənizdə dalğaların hündürlüyünün 13 metrədək qalxacağını bildirərək, sahil ərazisində yaşayanları dənizə çıxmamağa çağırırlar. Meteororloqlar güclü yağışlar nəticəsində torpaq sürüşmələrinin baş verə biləcəyi barədə də xəbərdarlıq edirlər.

Ehtiyat tədbirləri olaraq, tufanın keçəcəyi ərazilərdə qatarların hərəkətinin müvəqqəti dayandırılacağı da bildirilir.