Respublika ərazisində koronavirus pandemiyasının yayılmasının qarşısının alınması məqsədilə tətbiq olunan sosial izolyasiya tədbirləri ilə bağlı Daxili İşlər Nazirliyinin göstərişinə əsasən İsmayıllı Rayon Polis Şöbəsində də yaradılan mobil qrup ötən gün axşam reyd keçirib.
AZƏRTAC-ın bölgə müxbiri xəbər verir ki, mobil qrupun keçirdiyi reyddə məqsəd saat 21:00-dan etibarən rayon ərazisində mövcud ictimai-iaşə obyektlərinin fəaliyyət göstərib-göstərməməsini müəyyən etmək olub. Reyd zamanı İsmayıllı rayonu ərazisində 3 obyektin qadağalara riayət etməyərək fəaliyyət göstərdiyi müəyyən edilib. Həmin obyektlərin sahibləri ilə hüquqi-maarifləndirici söhbətlər aparılıb, fəaliyyətləri aktlaşdırılıb və onlara xəbərdarlıq edilib.
Obyekt sahibləri səhvlərini etiraf edib, bundan sonra obyektlərini təyin olan vaxt bağlayacaqlarını bildiriblər.