Ötən gün Türkiyə Böyük Millət Məclisində (TBMM) internet vasitəsilə müxtəlif dərmanların satışını reklam edənlər tənqid edilib.

Open.az xəbər verir ki, CHP-li millət vəkili, əczaçı Burhanettin Bulut: "İnternetdə ikinci əl dərman satışı dəbə minib. "Dərman preparatı deyil, dəstəkləyici məhsuldur" adı altında satılan lazımsız dərmanları sənət adamları, xüsusilə də Seda Sayan tez-tez reklam edir. Koronavirusla mübarizə etdiyimiz çətin günlərdə Seda Sayanın "Mən istifadə etdim. Orqanizmimə kömək etdi. Siz də yararlanın və virusa qalib gəlin!" deyərək reklam etdiyi dərmanlar əslində böyük təhlükə mənbəyidir. Dəfələrlə şikayət edilib, cərimə ediliblər. Amma hamı yoruldu, Seda Sayan isə yenə də müxtəlif dərman və ya dərman vasitələrini internet üzərindən reklam etməyə davam edir" deməsi ilə Türkiyə Böyük Millət Məclisində dərman satışını reklam edən sənət adamlarına qarşı tənqid kompaniyası başlanıb.

Qeyd edək ki, ötən il Türkiyədə internet üzərindən müxtəlif dərman və ya arıqladıcı çay adı ilə satılan məhsulların reklamını tanınmış sənət adamları həyata keçirib. Məhz bu səbəbdən də 2020-ci ildə bir qrup sənət adamı, o cümlədən də Seda Sayana pul cəzası kəsilmişdi.