dogruxeber.tv xəbər verir ki, sosial şəbəkələrdə Ucar rayon Bağırbəyli kənd sakinləri yolsuzluqdan şikayət edirlər.
Sakinlərin sözlərinə görə kəndin yollarında nəyinki piyada, heç avtomobillə də hərəkət etmək mümkün olmur. Yağıntılar olan zaman isə ümumiyyətlə küçələrdə hərəkət iflic vəziyyətə düşür.
Qeyd edək ki, ikinci Vətən müharibəsində şəhid olan Təbriz Bəkirov da Bağırbəyli kənd sakinidir.
Təbriz Bəkirov kimi qəhrəman oğullar yetişdirib, şəhid verən rayon, yaxud kənddəki bu çətinlik, şəraitsizlik Ucar rayon İcra hakimiyyəti başçısının idarəçiliyində olan rayona və rayon sakinlərinə laqeydliyidir.
Dəfələrlə müraciət etmələrinə baxmayaraq İcra hakimiyyəti başçısı Mənsur Məmmədovdan heç bir "işıq ucu" olmadığını görüncə, çarəsiz sakinlər Millət vəkili Ramil Həsənə ərizə ilə müraciət ediblər. Daha sonra qəbuluna gedib, deputatın şəxsən özünə dərdlərini deyiblər. Millət vəkili sakinlərə tezliklə həll olunacağına söz versə də hələ ki, problemi aradan qaldırmaq üçün heç bir addım atılmayıb.
Çarəsiz sakinlər bu dəfə artıq dərdlərini statuslar şəklində yazıb paylaşaraq, həllini sosial şəbəkələrdə arayırlar.

Mövzu ilə bağlı Ucar rayon İcra hakimiyyətinin də mövqeyini dinləməyə və dərc etməyə hazırıq.

Məsələni diqqətdə saxlayacağıq.