DogruXebər.az : - Qarabağda çaxnaşma müşahidə olunur, hamı Laçın dəhlizinin yaxın vaxtlarda bağlanmasından danışır.

Tanınmış erməni jurnalist, Ermənistan Jurnalistlər Birliyinin üzvü Nairi Oxikyan bu barədə sosial şəbəkələrdə yazıb.

Jurnalistin sözlərinə görə, "çaxnaşma böyük sürətlə yayılır". Jurnalist Qarabağ ərazisini tərk etmək istəyən ermənilərdən onlarla müraciət alır. Oxikyan, onları sosial media vasitəsi ilə sakitləşdirməyə çalışır.

Xatırladaq ki, 10 noyabr tarixli Moskva sazişi, Rusiya sülhməramlılarının məsuliyyət bölgəsindəki erməni yaşayış məntəqələrini Ermənistanla birləşdirən alternativ yolun tikintisini nəzərdə tutur. Hazırkı dəhliz Azərbaycanın Laçın rayonundan keçir.

Maraqlıdır, Azərbaycan hansı halda Laçın dəhlizini bağlaya bilər?

Mövzu ilə bağlı Cebhe.info-ya açıqlama verən Laçın alayının keçmiş komandiri, polkovnik Arif Paşa bildirib ki, Azərbaycan Laçın dəhlizini çoxdan bağlamalı idi:

“Ermənilər Zəngəzur dəhlizini bizə vermək istəmir, onlar çalışır ki, bu proses baş tutmasın. Onlar hesab edir ki, Zəngəzur dəhlizini verməyə bilər, amma biz Laçın dəhlizini onlara verməyə borcluyuq. Ermənilər özlərini məğlub yox, həyasızcasına qalib tərəf kimi aparırlar. Sanki 44 günlük müharibədə darmadağın olan tərəf onlar yox, bizik.

Buna səbəb isə Rusiya, Fransa və ABŞ-ın təcavüzkarları himayə etməsidir. Azərbaycan millətinin və ordusunun da səbrinin bir həddi var. Düşünürəm ki, Azərbaycan tezliklə Laçın dəhlizini bağlamalıdır. Orada yaşayan bütün ermənilərə münasibətdə aqressiv hüquqi mövqe tutmalıyıq. Çünki orada hazırda məskunlaşan ermənilər Azərbaycan suverenliyinə qarşı çıxıb. Buna görə də Dağlıq Qarabağda yaşayan ermənilər Azərbaycan hüququ qarşısında cinayət məsuliyyəti daşıyır”.

Polkovnik qeyd edib ki, bütün beynəlxalq qanunlar bizim tərəfimizdə olduğu üçün Azərbaycan istənilən vaxt Laçın dəhlizinin bağlanmasına qərar verə bilər:

“Qarabağ bütün dünya və BMT tərəfindən Azərbaycan ərazisi kimi tanınır. Bütün beynəlxalq qanunlara görə Azərbaycan Qarabağda sərhədlərinin toxunulmazlığı hüququna malikdir. Azərbaycan konkret olaraq öz şərtlərini ortaya qoymalıdır, Laçın dəhlizində gömrük-sərhəd buraxılış məntəqələri qurmalıdır.

Bütün beynəlxalq hüquqlar bizim xeyrimizədir. Hesab edirəm ki, Azərbaycan iradəsini ortaya qoyaraq, Laçın dəhlizini bağlamalıdır. Əgər Qarabağdakı erməni əhalisi bizim qanunları qəbul edərsə, orada yaşaya bilər, amma qəbul etməsə, onları torpaqlarımızdan çıxartmaq lazımdır”.