dogruxeber.tv: - Hazırda həbsdə olan Azərbaycan Avropa Hərəkatının sədri Ramin Hacılı quru aclığa başlayıb.

Qaynarinfo-ya daxil olan məlumatda bildirilir ki, o, artıq 4 gündür ki, qida və su qəbul etmir. Aksiyanın səbəbi isə onun həbsi ilə bağlıdır. Ramin Hacılı hesab edir ki, ona qarşı irəli sürülən ittihamlar əsassızdır.
Məlumatda həmçinin deyilir ki, Ramin Hacılının yeri dəyişdirilərək, Bakıdakı digər bir təcridxanaya köçürülüb. Hazırda onun vəziyyətinin yaxşı olmadığı bildirilir.

Qaynarinfo məsələ ilə əlaqədar Ədliyyə Nazirliyi ilə əlaqə saxlayıb. Qurumun ictimaiyyətlə əlaqələr şöbəsinin müdiri Mehman Sadıqov bildirib ki, aclıq aksiyası keçirən dustaq bununla bağlı saxlandığı təcridxanın rəhbərliyinə ərizə ilə müraciət etməlidir. "Həmin ərazidə bu addımın səbəbləri göstərilməlidir. Şifahi elan etməklə, yaxud da kiminsə vasitəsi ilə məlumat yaymaqla aksiya keçirilmir”, - deyə Mehman Sadıqov bildirib.

Onun sözlərinə görə, Ramin Hacılının aclıq aksiyası keçirdiyi barədə hər hansı rəsmi müraciəti yoxdur.

Onun digər müvəqqəti saxlanma təcridxanasına köçürülməsinə gəlincə, Mehman Sadıqov deyib ki, qanunvericiliklə məhbusun saxlanma yerinin açıqlanması qadağandır. "Bu yalnız həmin şəxsin öz istəyi ilə ola bilər”, - deyə o əlavə edib.

Rəsmi məlumata görə, Ramin Hacılı bir müddət əvvəl Almaniyadan deportasiya olunmuş Azərbaycan vətəndaşlarının ifadəsi əsasında saxlanılıb. O, Cinayət Məcəlləsinin 178 (dələduzluq) və 320-ci (saxta sənədlər hazırlama və ya belə sənədlərdən istifadə) maddələrilə ittiham edilir.