dogruxeber.tv: - Ramiz Mehdiyevin kürəkən İlham Əliyevə məxsus olduğu bildirilən “Yeni Gəncə” Tibb Mərkəzinin (“İntermedservis” MMC-nin) keçmiş direktoru Ülkər Kərimova tərəfindən “Hürriyyət”in redaksiyasına növbəti şikayət məktubu daxil olub.
Birinci vitse-prezident Mehriban Əliyevaya və digər dövlət qurumlarının rəhbərlərinə ünvanlanan müraciəti təqdim edirik:

“Hörmətli Mehriban xanım!

Bir müddət əvvəl mənim icraçı direktor vəzifəsində işlədiyim “İntermedservis” MMC-nin 3 nəfər işçisi tərəfindən 16.10.2020-ci il tarixdə yaşadığım mənzilə basqın edilib. Bu zaman mənə xəsarət almağımla nəticələnmiş fiziki güc tətbiq edilib və mənə məxsus 2000 (iki min) manat pul və brilliant zinət dəsti aparılıb. Bu barədə Azərbaycan Respublikasının Prezidentinə və digər instansiyalara müraciət etdikdən sonra mənə qarşı təzyiq və təhdidlər daha da artmışdır(Şikayətçi basqının Ramiz Mehdiyevin kürəkən İlham Əliyevin göstərişi ilə həyata keçirildiyini iddia edib – red.).

Gəncə şəhər Baş Polis İdarəsinin Təhqiqat və İstintaq İdarəsinin müstəntiqi Rəşad Məmmədzadənin mənimlə zərərçəkən kimi yox, cinayətkar kimi davrandığını, Məhkəmə Tibbi Ekspertizanın rəyinin nəticəsinə müdaxilə etdiyini nəzərə alaraq, onun apardığı təhqiqatın obyektivliyinə məndə inam qalmamışdır. Göstərilən faktlar barədə Azərbaycan Respublikasının Daxili İşlər naziri cənab Vilayət Eyvazova 22.11.2021-ci il tarixdə müraciət olunmuşdur. Mənim müraciətlərimdən sonra Rəşad Məmmədzadənin araşdırmanı daha da qərəzli aparması özünü biruzə vermişdir. Belə ki, Rəşad Məmmədzadənin Azərbaycan Respublikasının Potoloji Anatomiya və Məhkəmə Tibbi Ekspertiza Birliyinin Gəncə şəhər şobəsinin müdiri Cavanşir Əliyevə təzyiq göstərərək, ekspert rəyinin dəyişdirilərək daha yüngül xəsarətlə əvəzlənməsi, dəyişdirilməyəcəyi halda təkrar komisiyon ekspertiza təyin edəcəyi barədə hədə-qorxu gəlməsi onun araşdırmanı qərəzli aparmaqla, qarşı tərəfin mövqeyini müdafiə edərək cinayətin ört- basdır edilməsi istiqamətində fəaliyyətini təsdiq edir.

03.12.2021-ci il tarixdə Bakı şəhərində Potoloji Anatomiya və Məhkəmə Tibbi Ekspertiza Birliyində təkrar ekspertizadan keçirilməyimə baxmayaraq, hələ də mənə qarşı cinayət törətmiş şəxslər barəsində cinayət işinin başlanması haqda qərar qəbul olunmamışdır.

Müstəntiq Rəşad Məmmədzadə adıçəkilən şəxslər tərəfindən mənə qarşı törədilən cinayət hadisəsini araşdırmaqla mənim pozulmuş Konstitutsiya hüquqlarımı bərpa etmək əvəzinə, sifarişli qaydada cinayəti ört-basdır etməklə məşğuldur. Bu səbəbdən də onun apardığı araşdırmanın ədalətli olmasına şübhə ilə yanaşıram və araşdırmanın başqa müstəntiqə verilməsini tələb edirəm.

Mənə qarşı daha bir təzyiq və ədalətsizlik Dövlət Əmək Müfəttişliyi Xidmətinin Gəncə regional şöbəsinin rəisi Ayaz Rəhimov tərəfindən başlamışdir. Belə ki, Gəncə şəhər Prokurorluğu tərəfindən vəzifəli şəxs kimi, mənim barəmdə İnzibati Xətalar Məcəlləsinin 192.1 maddəsinə uyğun olaraq inzibati icraatın başlanması barədə Qərarına əsasən başlanmış inzibati icraat düzgün aparılmamış və birmənalı şəkildə Ayaz Rəhimov tərəfindən mənə bilbirilmişdir ki, “prokurorun qərarı olduğu üçün biz bunu müzakirə edə bilmərik və prokuror tərəfindən Sizə cərimə inzibati tənbeh növünün tətbiq olunması tapşırıldığı üçün biz heç nə edə bilmərik”. Nəticədə Ayaz Rəhimov tərəfindən mənə eyni vaxtda İXM-nin 192.1-ci maddəsinə əsasən 3000 (üç min) manat və 3500 (üç min beş yüz) manat məbləğində, cəmi 6500 (altı min beş yüz) manat cərimə tətbiq olunmuşdur. Ayaz Rəhimov prokurorun qərarını mənim iştirakımla müzakirə etməmiş, mənim irad və təkliflərimi, əlimdə olan zəruri sənədləri (işçi ilə bağlanmış xidməti müqaviləni) və izahatımda göstərdiyim halları araşdırıb nəzərə almadan, hətta tərəfimdən inzibati xəta törədilmiş olsa belə, həmin inzibati xətanın zərərli nəticələrinin aradan qaldırılaraq davam edən inzibati xəta olmadığını (İXM-nin 32.1.7. törədilmiş inzibati xətanın zərərli nəticələrinin inzibati xəta törətmiş şəxs tərəfindən aradan qaldırılması və ya vurulmuş zərərin əvəzinin könüllü surətdə ödənilməsi), mənim əmək müqaviləmə 2 ay öncə xitam verildiyi üçün mənim artıq vəzifəli şəxs statusu daşımadığımı, tərəfimdən törədilmiş inzibati xətanın insan həyatını xilas etmək zərurətindən yarandığını (İXM-nin Əməlin inzibati xəta olmasını aradanqaldıran hallar Maddə 19. Son zərurət 19.1. Bu Məcəllənin Xüsusi hissəsində nəzərdə tutulmuş əməllərin əlamətlərinə uyğun olsa da, son zərurət vəziyyətində, yəni şəxsin özünün və ya başqa şəxsin həyatını, sağlamlığını və ya hüquqlarını, dövlətin və ya cəmiyyətin mənafeyini qorxu altına alan təhlükəni aradan qaldırmaq üçün edilmiş hərəkət, əgər həmin vəziyyətdə bu təhlükəni digər vasitə ilə aradan qaldırmaq mümkün deyildirsə və bu zaman son zərurət həddinin aşılmasına yol verilməmişdirsə, bu, inzibati xəta hesab olunmur.) nəzərə almadan cərimə inzibati tənbeh növünü tətbiq etmişdir.

Yenidən 07.12.2021ci il tarixdə Ayaz Rəhimov tərəfindən barəmdə İXM-nin 192.4-cü maddəsinə əsasən inzibati xətanın aradan qaldırılması və mənim vəzifəli şəxs olmamağım nəzərə alınmadan 700 (yeddi yüz) manat məbləğində inzibati cərimə tətbiq edilmişdir. Ayaz Rəhimov qərar qəbul edəcək vəzifəli şəxs kimi mənimlə protokolun və qərarın müzakirəsində iştirak etməmiş, məni əmək müfəttişləri Arzu Əliyevin və Fizuli Verdiyevin xidməti otaqlarına göndərərək Arzu Əliyevlə müzakirə olunmasını bildirmişdir. Arzu Əliyev Prokurorun qərarının qərəzli olmasını söyləsədə barəmdə cərimə intizam tənbehinin tətbiq olunacağını bildirmişdir. Mən Arzu Əliyevə etirazımı bildirdikdə, bizim söhbətimizə həmin otaqda əyləşən əmək müfəttişi vəzifəsində işləyən Fizuli Verdiyev ona heç bir aidiyyatı olmadığı halda müdaxilə edərək dövlət qulluqçusunun etik davranış qaydalarını pozaraq mənimlə mübahisə etmiş və məni təhqir etmişdir. Ayaz Rəhimovun İnzibati İcraat Haqqında Azərbaycan Respublikasının Qanununun tələblərini pozduğunu, Fizuli Verdiyevin isə Dövlət qulluqçusunun etik davranış qaydalarını kobud şəkildə pozduğunu nəzərə alaraq barələrində tədbir görülməsini Sizdən xahiş edirəm.

Onu da bildirirəm ki, Ayaz Rəhimov Azərbaycan Respublikası Nazirlər Kabinetinin şöbə müdiri Niyazi Rəhimovun qardaşı, Arzu Əliyev isə Baş nazirin müavini Əli Əhmədovun qardaşı oğludur.

Hörmətli Mehriban xanım!

Xahiş edirəm, mənim 2 uşaq anası olmağımı, ailənin yeganə qazanc gətirən şəxsi olmağımı Rəşad Məmmədzadə, Ayaz Rəhimov və Fizuli Verdiyevlə güc nisbətlərimizin bərabər olmadığını nəzərə alaraq, mənə ədalət naminə köməklik göstərəsiniz”.

Qarşı tərəfin mövqeyini dərc etməyə hazırıq.