“Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin Milli Məclisdə təsdiqindən sonra iki ölkə arasında hərbi əməkdaşlıq yeni strateji mərhələyə daxil olub.

Yaxın vaxtlarda həmin qanun layihəsinin Türkiyə Böyük Millət Məclisində ratifikasiyası gözlənilir. Bundan sonra Azərbaycan və Türkiyə arasında hərbi müttəfiqliyin həyata keçirilməsi istiqamətində daha ciddi addımların atılacağı gözlənilir. Xüsusilə də tərəflərdən hər hansı birinin müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət, yaxud dövlətlər tərəfindən təcavüz təhlükəsi yaranarsa, birgə məsləhətləşmələr aparılacaq.

Bu təhdid və ya təcavüzün aradan qaldırılması məqsədilə BMT Nizamnaməsinə uyğun olaraq Azərbaycan və Türkiyə bir-birinə zəruri yardım göstərəcək. Ona görə də Azərbaycana qarşı hər hansı dövlət təcavüz aktı həyata keçirərsə, “Şuşa Bəyannaməsi”nə əsasən Türkiyə hərbi müqaviməti ilə üzləşə bilər. Azərbaycana qarşı ərazi iddiası ilə təcavüz edən ölkə Ermənistan olduğundan, “Şuşa Bəyannaməsi”nə uyğun olaraq, Türkiyə qanunvericilik qaydasında hərbi əməliyyatlara müdaxilə etmək hüququndan istifadə edəcək. Ancaq Türkiyə ilə Ermənistan arasında münasibətlərin normallaşdırılmasına dair danışıqlar aparıldığı bir vaxtda belə hərbi qarşıdurmanın baş verməsi barışıq prosesini poza bilər. Ona görə də “Şuşa Bəyannaməsi”nin icrası ilə bağlı atılacaq addımların Türkiyə-Ermənistan danışıqlarına mümkün təsirləri ilə bağlı suallar yaranıb. Milli Cəbhə Partiyasının sədr müavini, politoloq Məhəmməd Əsədullazadə Cebhe.info-ya bildirib ki, Şuşa Bəyannaməsinin Azərbaycan və Türkiyə parlamentlərində təsdiqi ilə hərbi və təhlükəsizlik sahəsində strateji əlaqələr yeni mərhələyə qədəm qoyur. Azərbaycan-Türkiyə tandeminin güclənməsi Cənubi Qafqazda yeni geosiyasi reallığın yaranması deməkdir:

“ “Şuşa Bəyannaməsi” üçüncü ölkələrə qarşı yönəlməyib və Azərbaycanın müdafiəsi, təhlükəsiliyi üçün birgə addımların atılmasını nəzərdə tutur. Təbii ki, Azərbaycana qarşı işğal faktı baş verərsə, Türkiyə öz qardaş müttəfiqinin yanında yer alacaq. Hesab edirəm ki, Türkiyə-Ermənistan münasibətlərinin normallaşdırılmasına dair danışıqların aparıldığı bir vaxtda “Şuşa Bəyannaməsi”nin təsdiqi müzakirələrə mənfi təsir etməyəcək. Bu, əvvəlcədən imzalanmış sənəddir və üçüncü dövlətə qarşı yönəlməyib. Azərbaycana qarşı Ermənistan tərəfindən hərbi təcavüz olarsa, Azərbaycan bunun qarşısını təkbaşına almağa qadirdir. Üçüncü qüvvələr Ermənistanla birlikdə Azərbaycanın ərazi bütövlüyünə, suverenliyinə və sərhədlərinin toxunulmazlığına təhlükə yaradarsa, Türkiyə ölkəmizin yanında yer alacaq. Bu, dövlətlərarası münasibətdir. “Şuşa Bəyannaməsi” Türkiyə-Ermənistan danışıqlarına mənfi təsir göstərə bilməz. Ermənilərin bu məsələni qaldırmağa və “Şuşa Bəyannaməsi”nə etiraz etməyə haqqı çatmır. Düşünürəm ki, Ermənistan bu mövzunun üzərinə getməyəcək”.