Bir neçə gün əvvəl "dogruxeber.tv" informasiya portalına Səbail rayon, Üzeyir Hacıbəyli küçəsi 41 ünvanında yerində market tikilməsi üçün bəzi ağacların artıq kəsilmə təhlükəsinin yarandığı barəsində sözügedən ünvanda yaşayan Ramil Kərimov tərəfindən məlumat daxil olmuşdur.

Ramil Kərimovun bildirdiyinə görə həmin ağacları onunla qardaşı birlikdə əkib, qulluq edib böyüdüblər. Bildirir ki, sözügedən torpaq sahəsi Səbail rayon Bələdiyyəsinin balansındadır və yalnız dəmir qaraj üçün çıxarışı var. Lakin, hansısa sahibkar tərəfindən orada tikinti daşı ilə market tikilməsi üçün artıq hazırlıqlara başlanılıb".

Vətəndaş ağacların kəsiləcəyindən narahat olub və qarşısının alınması üçün rayon bələdiyyəsinə, rayon icra hakimiyyətina, ərazi müvəkkili və Ekologiya Nazirliyinə müraciət etmişdi.

Məlumat redaksiyamıza daxil olduqdan dərhal sonra, "dogruxeber.tv" olaraq, Ekologiya və Təbii Sərvətlər Nazirliyi ilə əlaqə saxlayıb, məlumatı və ünvanı verdik.

ETSN ilə danışdıqdan bir neçə dəqiqə sonra, 11 saylı Bakı Regional Ekologiya və Təbii Sərvətlər idarəsinin sözügedən ərazi üzrə əməkdaşı Cavad adlı şəxs bizə zəng edib ünvanı soruşdu. Həmin ünvanı ona da bildirdik.

Cavad adlı müfəttiş bir gün sonra yenidən bizə zəng etdi, ərazidə olduğunu və həmin ağaclar barəsində akt tərtib etdiyini bildirdi və qeyd etdi ki, gələcəkdə aqrar xidmətlərin göstərilməsi üçün nazirlik tərəfindən əməkdaş cəlb olunacaqdır.
dogruxeber.tv