ABŞ-ın Nebraska ştatında yerləşən Curtis şəhəri əhalinin azalmasının qarşısını almaq və yerli iqtisadiyyatı canlandırmaq məqsədilə yeni təşviq proqramına başlayıb. Layihə çərçivəsində şəhərə daimi köçərək fərdi yaşayış evi tikmək istəyən şəxslərə tamamilə pulsuz torpaq sahələri ayrılır.

DogruXeber.tv xəbər verir ki, proqram Medicine Valley İqtisadi İnkişaf Şurası tərəfindən həyata keçirilir. Məqsəd şəhərin əhalisini artırmaq, işçi qüvvəsini gücləndirmək və iqtisadi fəallığı davamlı saxlamaqdır. Ayrılan torpaq sahələrinin bütün əsas infrastruktur təminatı – yollar, su, elektrik və digər kommunal xidmətlər əvvəlcədən hazır vəziyyətə gətirilib.

Pulsuz torpaq almaq istəyən namizədlər aşağıdakı tələblərə əməl etməlidirlər:
Torpaq sahəsini aldıqdan sonra müəyyən olunmuş müddət ərzində fərdi yaşayış evi tikməlidirlər.
Şəhərə daimi yaşayış üçün köçməli, torpaqdan yalnız investisiya və ya mövsümi yaşayış məqsədilə istifadə etməməlidirlər.
Evin tikintisi və sonrakı bütün xərclər torpaq sahibinin özü tərəfindən qarşılanmalıdır.

Proqram çərçivəsində uşaqlı ailələr üçün də əlavə təşviqlər nəzərdə tutulub. Yerli məktəbdə təhsil alan uşaqları olan ailələrə müəyyən məbləğdə maliyyə dəstəyi təqdim edilir. Şəhər rəhbərliyi hesab edir ki, bu addım məktəblərin fəaliyyətini qorumağa və gənc ailələri bölgəyə cəlb etməyə kömək edəcək.

Curtis rəhbərliyi bildirir ki, proqramın əsas məqsədi təkcə yeni sakinlər cəlb etmək deyil, həm də uzunmüddətli və dayanıqlı icma formalaşdırmaqdır. Son illərdə layihə çərçivəsində bir neçə ailə şəhərə köçüb, yeni yaşayış evləri tikilib və yerli iqtisadi fəallığın artdığı qeyd olunur. Musavat.com