“Azərbaycan Qarabağa heç bir muxtariyyət verməyəcək".

Bunu Ermənistanın Baş naziri Nikol Paşinyan deyib.

O, rəsmi Bakının Qarabağla bağlı mövqeyini dəfələrlə bəyan etdiyini xatırladıb.

Görünür, Paşinyan artıq reallıqla barışıb. Bəs onun bu açıqlamasından sonra Moskvada keçiriləcək xarici işlər nazirlərinin görüşündən nə gözlənilə bilər? Sülhə nail olmaq mümkündür?

Mövzu ilə bağlı Cebhe.info-ya açıqlama verən politoloq Aytən Qurbanova bildirib ki, Nikol Paşinyanın bu günə qədər olan bütün bəyanatlarının arxasında heç bir qətiyyətli siyasi iradənin olmadığının dəfələrlə şahidi olmuşuq:

"Ona görə də Moskva görüşünün nəticəsində əvvəlkindən tamamilə ziddiyyətli fikirlərin səsləndirilməsi ehtimalı heç bir halda istisna edilmir. Bu gün bizim üçün əsas olan Paşinyanın belə bəyanatları ilə paralel olaraq Azərbaycanın atdığı qətiyyətli addımlar vasitəsilə onun və ona havadarlıq edən siyasi dairələrin danışıqlar masasında ola biləcək bütün siyasi manevr imkanlarını zərərsizləşdirməkdir.

Məhz bu nöqteyi-nəzərdən yanaşdıqda, sülh danışıqlarının hansı formatda davam etməsindən və ya onun nəticələrindən asılı olmayaraq, Azərbaycanın qarşıya qoyulan hədəflərə mərhələli şəkildə çataraq sülh prosesini özünün formalaşdırdığı yeni reallıqlar əsasında davam etdirməyə artıq müvəffəq olduğunu əminliklə deyə bilərik".//dia.az