Çinin cənubunda yerləşən Haynan əyalətində təyyarə qəzaya uğrayıb.

"dogruxeber.tv" xəbər verir ki, bu barədə Çinin "Zimu Xinwen” informasiya portalı yerli hakimiyyət orqanlarına istinadən məlumat yayıb.

Materialda qeyd olunur ki, avqustun 8-i səhər saatlarında sosial şəbəkələrdə təyyarənin qəzaya uğraması ilə bağlı video yayılıb. Jurnalistlərin məlumatına görə, hadisə Donfanq qraflığının Baso şəhəri yaxınlığında baş verib.

Hazırda təcili yardım xidmətləri hadisə yerinə gedir. Fövqəladə vəziyyətin səbəbləri və tələfatla bağlı hələlik məlumat daxil olmayıb.

Təyyarənin qəzaya uğraması ilə bağlı məlumat hüquq-mühafizə orqanları tərəfindən təsdiqlənib. Hazırda polis hadisə yerində işləyir və yerli sakinləri fövqəladə hadisə yerinə yaxınlaşmamağa çağırıb.