dogruxeber.tv: - Xəzər rayonu, Hövsan qəsəbəsində Quşçuluq fermasının yanında zibil tullantıları yandırılıb.

Sitat.info-nun əməkdaşı təsadüfən ərazidən keçərkən hadisənin şahidi olub.
Müxbirimiz axşam saat 20:00 radələrində bir neçə şəxsin zibil tullantılarını yandıraraq, ərazidən qaçdığını müşahidə edib və zibil tullantılarının yandırılma anını da lentə alıb.
Əməkdaşımız avtomobili ilə həmin şəxslərə yaxınlaşmaq istədikdə, qaçıblar.
Qısa zamanda ətrafa böyük qara tüstü yayılıb. Ərazini üfunət iyi basıb. Havadan yayılan üfunət qoxusundan quşçuluq təsərrüfatının tullantılarının yandırıldığı bəlli olub.
Həmin ətrafda yaşayan sakinlərlə də həmsöhbət olduq.
Bildirdilər ki, ərazidə ördək ferması fəaliyyət göstərir. Həmin fermadan çıxan tullantılardır.
Məsələ ilə bağlı Ekologiya və Təbii Sərvətlər Nazirliyinin mətbuat xidməti ilə əlaqə saxladıq.
Bizə məsələnin nəzarətə götürüldüyünü və araşdırılacağını bildirdilər.
Həmin videonu təqdim edirik:

Dünən səhər saatlarında Xəzər rayonu, Hövsan qəsəbəsində quşçuluq təssərrüfatına aid tullantılarının yandırılması ilə bağlı xəbər dərc etmişdik.



Bu barədə Ekologiya Nazirliyinə etdiyimiz müraciətin ardından nazirliyin əməkaşları hadisə yerinə baş çəkib, araşdırma aparıblar.

Araşdırma zamanı bəlli olub ki, tullantıları yandıranlar həmin ərazidə fəaliyyət göstərən quşçuluq təsərrüfatının işçiləri olublar.

Sitat.info-ya danışan Ekologiya Nazirliyinin əməkdaşı bildirib ki, müəssisədən çıxarılan quşların içalatını təkərlərin içərisinə yığaraq yandırıblar. Məqsəd iz itirmək olub. Bəlli olub ki, müəssisə tullantılarını bu yolla “təmizləyirmiş”.

Bildirilib ki, dərhal quşçuluq təsərrüfatının sahibinə məlumat verilib, məsələ ətraflı araşdırılıb. Qısa zamanda protokol tərtib ediləcək.