Yasamal Rayon Məhkəməsində qəsdən sağlamlığa yüngül zərər vurmada təqsirləndirilən Məmməd Əkbərovun (adı, soyadı şərtidir) cinayət işi üzrə məhkəmə istintaqı yekunlaşıb.

"DogruXeber.tv"nin Pravda.az-dan əldə etdiyi məlumata görə, hakim Mirsadiq Seyidovun sədrliyi ilə keçirilən prosesdə hökm oxunub.

Məhkəmənin hökmü ilə o, cinayət məsuliyyətindən azad edilib və barəsində olan cinayət işinin icraatına xitam verilib.

İttihama görə, hadisə bu il paytaxtın Yasamal rayonu, Əsəd Əhmədov küçəsində, “Şərur” MTK-nın zirzəmisində qeydə alınıb.

Məmməd Əkbərov həmin ərazidə yerləşən avtoyuma məntəqəsinin istirahət otağında baş vermiş hadisə zamanı zərərçəkmiş Zamiq Bəkirova (adı, soyadı şərtidir) qarşı qəsdən bədən xəsarəti yetirməklə cinayət törədib.

Belə ki, təqsirləndirilən şəxs zərərçəkmiş şəxsə məxsus “Renault” markalı avtomobilin vaxtında yuyulmaması səbəbindən aralarında yaranmış münasibətlərin pozulması zəminində mübahisə edib. Mübahisə zamanı o, emosional gərginlik və aqressiya nümayiş etdirərək, Zamiqin sağ sifət nahiyəsinə qəsdən sillə ilə zərbə endirib.

Hadisədən sonra Məmməd Əkbərov saxlanılaraq cinayət məsuliyyətinə cəlb edilib.

Məhkəmədə elan edilib ki, zərərçəkmiş təqsirləndirilən şəxslə barışıb, ondan şikayət və tələbi yoxdur.