İranın ali lideri Müctəba Xameneinin təxminən üç aydır gizləndiyi və təhlükəsizlik baxımından “Əl-Qaidə” lideri Usamə bin Ladenin istifadə etdiyi üsullara bənzər taktika seçdiyi iddia olunur.

DogruXeber.tv "Fox News"a istinadən xəbər verir ki, bu barədə terrorizmlə mübarizə üzrə ekspert Ömər Məhəmməd açıqlama verib.

Məlumata görə, ABŞ Prezidenti Donald Tramp mayın 19-na planlaşdırılan mümkün hücumu dayandırdıqdan sonra Vaşinqton və Tehran arasında gərginlik davam edir. Tramp son açıqlamasında “tələsmədiyini” bildirib.

Ekspertin sözlərinə görə, Müctəba Xamenei ictimaiyyət qarşısına çıxmır və yalnız sosial şəbəkələr vasitəsilə məhdud paylaşımlar edir. O bildirib ki, ABŞ ilk dəfə İran rəhbərliyinə qarşı vaxtilə “Əl-Qaidə” və İŞİD-ə qarşı tətbiq etdiyi taktikanı həyata keçirib.

Ömər Məhəmməd qeyd edib ki, Usamə bin Laden 2007-ci ildən sonra videomüraciətləri dayandırmış, yalnız əl vasitəsilə çatdırılan audio mesajlardan istifadə etmişdi. ABŞ xüsusi xidmət orqanları isə sonradan onun kuryerlərindən birini izləyərək Pakistanın Abbottabad şəhərindəki gizli iqamətgahını müəyyən etmiş və 2011-ci ildə keçirilən əməliyyatda bin Ladeni öldürmüşdü.

Ekspert hesab edir ki, İran rəhbərliyi də həmin təcrübəni diqqətlə öyrənib və Müctəba Xamenei hazırda İnqilab Keşikçiləri Korpusunun obyektləri yaxınlığında yerləşən gücləndirilmiş mühafizə zonalarında gizlənə bilər.

"Fox News"un məlumatına görə, Müctəba Xameneinin atası, İranın keçmiş ali lideri Əli Xamenei fevralın 28-də ABŞ-İsrailin “Epik Qəzəb” əməliyyatı zamanı Tehranda həyata keçirilən hava hücumunda öldürülüb.

Ömər Məhəmməd bildirib ki, İran rəhbərliyinin ictimaiyyət qarşısına çıxmaması ölkədə hakimiyyət modelinin dəyişdiyini göstərir və real idarəetmənin təhlükəsizlik strukturlarının əlinə keçdiyi görüntüsünü yaradır./teleqraf.az