Ötən gün hərbi ekspert Ədalət Verdiyev Qarabağda anti-terror əməliyyatı anonsu ilə çıxış etmişdi. O Xankəndidə və Şuşada həyəcan siqnallarının verilməsi barədə sosial şəbəkədə məlumat yaydı. Bu açıqlamaların açar sözü nədir?DoğruXəbər.az xəbər verir ki, “Yeni Sabah”a açıqlamasında Ədalət Verdiyev ölkə rəhbərinin ermənilərin Qarabağdakı qanunsuz hərbi birləşmələri haqda verdiyi vaxtın bitməsindən qaynaqlanan hadisələrin baş verdiyini qeyd edib:

“Bu ilin 6 ayının yekunlarında cənab prezident də bildirdi ki, Ermənistan tərəfi bizə qərarını bildirsin. Üstündən 10 gündən çox vaxt keçib. O bəyanatda sülhməramlılara da etiraz səsləndirilmişdi ki, erməni silahlıları ərazidən çıxarılmayıb.

Bu bəyanatlara Ermənistan cavab vermək əvəzinə 1 gün ərzində 9 dəfə atəşkəsi pozub. Təbii ki, əks tərəf çox gözəl anlayır ki, bu fəaliyyətlər cəzasız qalmayacaq. Odur ki, Xankəndidə verilən həyəcan siqnalını rəsmi olaraq erməni tərəfi təlim məqsədi ilə verildiyini açıqladı. Amma real olaraq Azərbaycanın 7-si sülhməramlıların nəzarətindən olmaqla 9 dəfə atəşkəsin pozulmasına adekvat və təsirli reaksiya verəcəyinə şübhə olmamalıdır. Mən həmin statusda məsələnin alt sətirini ictimaiyyətə açıqlamaq məqsədi ilə vermişəm”.

Ekspert bildirir ki, antiterror əməliyyatlarının başlama ehtimalı özünün apardığı analizlərin nəticəsidir:

“Mən ərazi ilə bağlı adamam. Nə baş verdiyini izləyən, analiz edən adamam. Erməni mediasını izləyirəm, bəzən internetdə olmayan məlumatları da açıqlayıram. Baş verən hadisələrin hamısını bir yerə toplayıb açıqlama verirəm. Mənim dövlətdə nə vəzifəm var, nə əlaqəm. Olsaydı, dəqiq vaxtını yazardım”.