Azərbaycanda məmur-vətəndaş münasibətlərində illərlə formalaşmış bir model var: yüksəkdən baxan, dinləməyən, gözlədən və əmr tonunda danışan dövlət qulluqçusu. Bu model dəyişmir, çünki cəzasızlıq və qeyri-şəffaf idarəetmə məmurların xalqdan uzaq şəkildə, öz qapalı dairələri içində yaşamasına şərait yaradır.

"dogruxeber.tv" redaksiyasına daxil olan şikayətlər, sosial şəbəkələrdə yayılan videolar və ictimai narazılıqlar göstərir ki, vətəndaşların çoxu rəsmi qurumlara yalnız məcburiyyət qarşısında müraciət edir. Səbəb sadədir – gözlənilən nəticə yoxdur. Süründürməçilik, kobudluq, izah vermək əvəzinə “get-gəl”, bəzi hallarda isə açıq-aşkar təhqiramiz münasibət insanların haqlı narazılığına səbəb olur.

Qapısı bağlı, telefonu cavabsız, qəbul günü müəyyən olunmamış vətəndaş xidmətləri real xidmət göstərmək əvəzinə, formal prosedur yerinə yetirir. Regionlarda isə vəziyyət daha kritikdir. Bəzi icra hakimiyyəti nümayəndələrinin və yerli məmurların sadə vətəndaşı “öz altdaşları” kimi görməsi, kiçik bir arayış üçün saatlarla gözlətməsi və ya “tanışlıqla həll” mexanizminə üstünlük verməsi, dövlətlə xalq arasında dərin bir uçurum yaradır.

"dogruxeber.tv" olaraq müşahidə etdiyimiz bir tendensiya da ondan ibarətdir ki, məmurların böyük hissəsi ictimai qınaqdan və medianın araşdırmalarından çəkinmir. Çünki əksər hallarda bu davranışlar cəzalandırılmır, vətəndaş şikayət etsə belə nəticə dəyişmir. Məmur toxunulmazlığı düşüncəsi inzibati strukturların özlərini cəmiyyətin fövqündə hiss etmələrinə gətirib çıxarır.

Dövlət qulluqçusu xalqın xidmətçisidir fikri son illərdə rəsmi ritorikada tez-tez səslənsə də, əksər məmurlar hələ də bu anlayışdan uzaqdır. Onlar üçün vəzifə ictimai məsuliyyət deyil, şəxsi status və üstünlük rəmzidir. Bu yanaşma dəyişmədikcə, cəmiyyətin sistemə olan inamı da bərpa olunmayacaq.

Əgər məmur xalqın yanına düşməzsə, xalq da dövlətdən üz döndərər. Bu isə təkcə sosial deyil, siyasi etimad böhranına gətirib çıxaracaq.