Azərbaycan Respublikası Ədliyyə Nazirliyinin Bələdiyyələrlə İş Baş İdarəsindən "DogruXeber.tv"nin baş redaktoru Kamal Əsgərova ünvanlanan rəsmi cavab məktubu Qobu bələdiyyəsinin fəaliyyəti ətrafında uzun müddətdir səsləndirilən faktların hüquqi əsaslarla təsdiqləndiyini göstərir.

Rəsmi sənəddə açıq şəkildə qeyd olunur ki, Abşeron rayonu Qobu bələdiyyəsinin sədri Araz Nəcəfovun qanunsuz hərəkətləri ilə bağlı daxil olmuş müraciətlər əsasında materiallar toplanıb və həmin materiallar Azərbaycan Respublikasının Baş Prokurorluğuna göndərilib. Eyni zamanda, Qobu bələdiyyəsinin 2020–2024-cü illər üzrə fəaliyyəti inzibati nəzarət icraatı qaydasında araşdırılıb və toplanmış sənədlər 03.06.2025-ci il tarixində hüquqi qiymət verilməsi üçün Baş Prokurorluğa təqdim edilib.

Bu faktlar onu göstərir ki, Qobu bələdiyyəsi ilə bağlı səsləndirilənlər ayrı-ayrı narazılıqlar deyil, sistemli və ardıcıl xarakter daşıyan qanun pozuntularıdır.

Mövcud məlumatlara görə, Qobu ərazisində yerləşən dəyərli və perspektivli torpaq sahələri bələdiyyə sədrinin yaxın qohumlarının adına rəsmiləşdirilib. Torpaqlar birbaşa Araz Nəcəfovun adına keçirilməyib, müxtəlif texniki sənədləşmə mexanizmləri vasitəsilə xalamoğlularının və digər yaxın qohumlarının adına yönləndirilib, sonradan isə satılaraq əldə olunan vəsaitlər mənimsənilib.

"DogruXeber.tv" tərəfindən yayımlanan səs yazısında Rəhman adlı şəxsin dedikləri bu mexanizmin mahiyyətini açıq şəkildə ortaya qoyur. Həmin şəxs Araz Nəcəfovun xalamoğlu olduğunu açıq etiraf edir, torpaq sahələrinin məqsədli şəkildə bələdiyyə sədrinin adına deyil, öz adlarına və digər qohumların adına rəsmiləşdirildiyini, daha sonra isə satıldığını bildirir. Bu açıqlamalar torpaq bölgüsünün planlı, qohumluq əlaqələrinə əsaslanan sxem üzrə həyata keçirildiyini göstərir.

İzləmək üçün toxun: ŞOK SƏS YAZISI!!!
Kənd sakinlərinin bildirdiyinə görə, ailələr böyüdükcə torpaq sahəsi əldə etmək imkansız vəziyyətə düşüb. Bələdiyyəyə müraciətlər zamanı torpaq fondunun olmadığı bildirilsə də, faktiki olaraq həmin ərazilərdə torpaqlar başqa şəxslərin adına sənədləşdirilir və satılır. Bu vəziyyət bələdiyyə torpaq fondunun vətəndaşların deyil, məhdud bir çevrənin maraqlarına xidmət etdiyini ortaya qoyur.

Qobu bələdiyyəsinin sədri Araz Nəcəfov tərəfindən müxtəlif vaxtlarda vədlər verilsə də, zərər çəkmiş şəxslərin problemləri bu günədək həll olunmayıb. Vətəndaşların maddi və hüquqi zərərlərinin aradan qaldırılması istiqamətində heç bir real addım atılmayıb.

Ədliyyə Nazirliyinin rəsmi cavabında vətəndaşların qanunsuz qərar və hərəkətlərdən məhkəməyə müraciət etmək hüququnun olduğu xüsusi olaraq qeyd edilir. Lakin mövcud faktlar göstərir ki, burada söhbət təkcə inzibati mübahisələrdən deyil, vəzifə səlahiyyətlərindən sui-istifadə, mümkün korrupsiya və cinayət tərkibli əməllərdən gedir.


Toplanmış materialların Baş Prokurorluğa göndərilməsi Qobu bələdiyyəsində baş verənlərin artıq hüquqi müstəvidə araşdırıldığını təsdiqləyir. Bu faktlar yerli özünüidarəetmə orqanlarında qohumbazlığın, torpaq talanının və nəzarətsizliyin açıq nümunəsi kimi dəyərləndirilir.

"DogruXeber.tv" məsələni diqqətdə saxlayır və araşdırmanın gedişi ilə bağlı ictimaiyyəti məlumatlandırmağa davam edəcək.

Qobu bələdiyyə sədri Araz Nəcəfovun himayədarı onu necə qoruyur?