Sosial Xidmətlər Agentliyi “Hünər-İnşaat” Firması ilə satınalma müqaviləsi imzalayıb.

"DogruXeber.tv"nin Qaynarinfo-ya istinad məlumatına görə, müqavilədə əlilliyi müəyyən edilmiş şəxslərə və şəhid ailələrinə Ağdaş rayonunda 20 ədəd ikiotaqlı, 27 ədəd üçotaqlı mənzilin satın alınması nəzərdə tutulur. Müqavilənin maliyyə dəyəri 3 186 650 manatdır.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Hünər-İnşaat” MMC 12 dekabr 2004-cü ildə qeydiyyata alınıb. Nizamnamə kapitalı 10 manatdır. Şirkətin hüquqi ünvanı Bakı şəhəri Nərimanov rayonu, İsmayıl Hidayətzadə küçəsi, ev 7A, mənzil 136, məhəllə 1911-də yerləşir. MMC-nin qanuni təmsilçisi Nəbiyev Yunis Nəbi oğludur. Açıq mənbələrdə “Hünər-İnşaat” MMC haqqında heç bir məlumat yoxdur.
Yunis Nəbiyevə gəlincə, araşdırmalarımız zamanı məlum olub ki, o, 2024-cü ilədək “6-cı mərtəbə” Müstəqil Şirkətinin rəhbəri vəzifəsində çalışıb. Hazırda şirkətin rəhbəri Atəş Təhməzovdur. O, Azərbaycan Qida Təhlükəsizliyi Agentliyinin (AQTA)sədri Qoşqar Təhməzlinin qardaşıdır.

Mediada gedən məlumatlardan aydın olur ki, “Hünər-İnşaat” MMC də Qoşqar Təhməzliyə yaxın şirkətdir. “Hünər-İnşaat” MMC-nin Qoşqar Təhməzlinin təsisçisi olduğu “Medeks” MMC ilə eyni hüquqi ünvanda yerləşməsi bu iddiaların əsasız olmadığına şübhələri artırır.

Yeri gəlmişkən, bir neçə gün əvvəl “Medeks” MMC İnnovasiya və Təchizat Mərkəzinin tibbi sərf mallarının satın alınması ilə bağlı keçirdiyi tenderin qalibi seçilib. Bu tender üzrə satınalma müqaviləsinin maliyyə dəyəri 865 346,51 manatdır.