Meksika şəhəri yaxınlığında yerləşən məşhur Teotihuacan arxeoloji kompleksinin ərazisində silahlı insident baş verib.
DogruXeber.tv Reuters-ə istinadən xəbər verir ki, silahlı şəxs atəş açaraq bir Kanada vətəndaşını öldürüb, daha 13 nəfəri yaralayıb.

Şahidlərin bildirdiyinə görə, 27 yaşlı kişi Ay Piramidasına qalxaraq qışqırıb və təsadüfi istiqamətlərə atəş açmağa başlayıb. Onun üzərində planşet olduğu da qeyd olunur.

Hadisədən sonra hücum edən şəxs intihar edib. Onun Mexiko şəhər sakini Julio Sezar Jasso Ramirez olduğu müəyyən edilib. Cəsədinin yanında, Kolumbin məktəbi hücumunu törədən şəxslərin süni intellekt vasitəsilə hazırlanmış görüntülərini əks etdirən foto çərçivə tapılıb.

Yaralananlar arasında ABŞ, Kolumbiya, Braziliya, Kanada və Rusiya vətəndaşlarının olduğu bildirilir. Rusiya səfirliyinin məlumatına görə, yaralı Rusiya vətəndaşının vəziyyəti stabildir və o, həkim nəzarəti altındadır.

Teotihuacan ölkənin ən böyük və ən çox ziyarət edilən arxeoloji komplekslərindən biridir. Hadisədən sonra hakimiyyət orqanlarının turistik ərazilərdə təhlükəsizlik tədbirlərini gücləndirəcəyi gözlənilir.