İnkişafda olan cəmiyyətlərdə sosial yardım sistemləri həssas təbəqələrin həyatını nisbətən yüngülləşdirmək məqsədi daşıyır. Azərbaycanda da aztəminatlı ailələrə dəstək məqsədilə müxtəlif sosial proqramlar həyata keçirilir. Lakin praktikada bu dəstəyə çatmaq, çox zaman nəzəriyyədə göründüyü qədər asan olmur.

“dogruxeber.tv” redaksiyasına daxil olan məlumatlar və monitorinqlər göstərir ki, vətəndaşlar yardım alma prosesi zamanı bir çox maneələrlə üzləşirlər.

Ərizə ilə başlayan, uzunmüddətli gözləmə ilə davam edən proses

Sosial yardım almaq üçün müraciət edən ailələr ilk növbədə elektron sistem vasitəsilə qeydiyyatdan keçməlidirlər. Lakin burada qarşıya çıxan texniki problemlər, sənədlərin düzgün yüklənməməsi və ya sistemin səhvləri çoxlarını prosesdən uzaqlaşdırır. Bəzən sadə bir arayışın olmaması və ya ünvan məlumatlarının uyğun gəlməməsi səbəbilə ailələr yardım hüququndan məhrum olur.

Ən böyük çətinliklərdən biri də “ünvanlı yardım” anlayışının yalnız rəsmi göstəricilərə əsaslanmasıdır. Reallıqda isə eyni ailədə faktiki yaşayan şəxslərin sayı ilə qeydiyyatda olan şəxslər üst-üstə düşmədikdə, sistem ailəni “qənaətbəxş gəlirli” kimi qiymətləndirə bilər. Bu isə, ehtiyac içində yaşayan insanların kölgədə qalmasına səbəb olur. “dogruxeber.tv” olaraq bizə müraciət edən bir çox ailə, müraciət etdikdən sonra hər hansı cavabın gəlmədiyini və ya uzun müddət gözlədiklərini bildirirlər.

Sosial rifahı yalnız yardım deyil, anlayış da gücləndirir

Sosial yardım sisteminin effektivliyi təkcə müraciət və sənəd prosedurları ilə deyil, həm də vətəndaşın maarifləndirilməsi ilə ölçülür. Əhali bəzən hüquqlarından və müraciət imkanlarından xəbərsiz olur. Bu baxımdan aidiyyəti qurumların informasiya resurslarının genişləndirilməsi və regional səviyyədə mobil sosial xidmətlərin təşkili olduqca vacibdir.

“dogruxeber.tv” bu istiqamətdə vətəndaşların səsini çatdırmağa davam edəcək. Məqsədimiz yardım almaq istəyən insanların sistemdə it-bat olmaması, çarəsizlikdən prosesdən geri çəkilməməsidir. Çünki sosial yardım hüquqdur, lütf deyil.