Cəmiyyətin inkişafı və ailə institutunun sağlam şəkildə formalaşması üçün nikah yaşı və şəxsi hazırlıq mühüm amillərdən biridir. Erkən nikahların bir çox hallarda psixoloji, emosional və sosial cəhətdən hazırlıqsız insanların üzərinə qoyduğu məsuliyyət uzunmüddətli nəticələrə səbəb olur. Yetkinlik yaşına çatmamış və həyat təcrübəsi formalaşmamış şəxslərin ailə həyatı qurması ailədaxili anlaşılmazlıqlar, təhsil yarımçılığı, iqtisadi çətinliklər və fərdi inkişafın dayanması kimi mənfi hallara yol aça bilər.

Ailə qurmaq təkcə birgə yaşamaq deyil, həm də qarşılıqlı anlaşma, maddi və mənəvi dəstək, məsuliyyət bölgüsü və gələcəyi planlamaq bacarığı tələb edir.

“dogruxeber.tv” olaraq qeyd edirik ki, erkən yaşda qurulan ailələrin əksəriyyəti bu bacarıqları tam mənimsəməmiş şəxslər arasında baş verdiyindən, nəticədə boşanma halları artır, uşaqların düzgün tərbiyəsində problemlər yaranır və sosial gərginliklərə zəmin yaranır. Bu həm fərdi, həm də ümumi cəmiyyət səviyyəsində mənfi təsirlər doğurur.

Ailənin sağlam qurulması üçün tərəflər arasında qarşılıqlı inam, sosial və emosional uyğunluq əsas şərtlərdən biridir. Erkən nikah isə çox vaxt ailələrin və ya ətraf mühitin təzyiqi ilə, düşünülməmiş qərar nəticəsində baş verir. Bu zaman gənclər təhsil və şəxsi inkişaf imkanlarını itirir, sosial çevrələri məhdudlaşır və həyatlarının təməl dövrünü özləri üçün deyil, başqalarının seçimi ilə yaşayırlar.

“dogruxeber.tv” bu məsələ ilə bağlı cəmiyyətdə maarifləndirmənin artırılmasını vacib hesab edir və ailələrin, müəllimlərin, eləcə də ictimai təsisatların gənclərə düzgün istiqamət verməsini zəruri sayır.