DogruXeber.tv: - Azərbaycan Qida Təhlükəsizliyi Agentliyi “Chipsim Kabab”, “Chipsim Tomat” və “Rekord” qablaşdırılmış qidaları satışdan çıxarıb. Səbəb sözügedən məhsulların tərkibində E-621 qida əlavəsinin normadan artıq olması olub.

Bu məqamda sual yaranır. Satışı davam edən müxtəlif adlarla satılan çipslər zərərsizdirmi? Digər çipslər nə qədər təhlükəsizdir?


Sualımızı cavablandıran Azad İstehlakçılar İctimai Birliyinin sədri Eyyub Hüseynov Tribunainfo.az-a açıqlamasında bildirib ki, AQTA-nın adı çəkilən çipsləri satışdan yığışdırması o demək deyil ki, satışı davam edən çipslərdə heç bir problem yoxdur.
İB sədrinin sözlərinə görə, bu cür qidalardan uzaq durmaq lazımdır:

“Ümumiyyətlə çipslər arzuolunmaz qida hesab olunur. Əksər hallarda xaricdən gətirilən çipslər geni dəyişdirilmiş kartoflardan hazırlanır. Bu paketli qidaların tərkibində uşaqların iştahını kəsən, aclıq hissini öldürən maddələr var.


Mən Kanadada olan zaman böyük maşında çipslər satıldığının şahidi oldum. İnsanlar o maşına yaxınlaşır, çips alırdılar. Maşının içərisinin görünən bir hissəsi var idi. Mən istehlakçı hüquqlarını qoruduğum üçün bu mənim diqqətimi çəkmişdi və o görünən hissədən çips hazırlanan maşının içinə baxdım. Maşının içində son dərəcə kirli kartoflar yuyulmadan keçmədən çipsə çevrilirdi. Təsvir edin, kirli və qaralmış kartofdan ağ və ləzzətli çipslər hazırlanır. Bunlar hamısı o çipslərə qatılan əlavə qatqılar, dadlandırıcılar, qida əlavələri hesabında başa gəlir. İnsanlar başa düşməlidir ki, onlar çips yeyərkən kartof yemirlər. Kimyəvi maddələr, zərərli qida əlavələri qəbul etmiş olurlar. Kanada kimi inkişaf etmiş, qidalarına son dərəcə diqqətlə yanaşılan ölkələrdə çipslər bu şəkildə hazırlanırsa, təsvir etmək mümkün deyil ki, bizim ölkədə bu qidalar hansı formada düzəldilir”.

E.Hüseynov bildirib ki, satışda zərərsiz, xeyirli və məsləhətli bir dənə də çips yoxdur:

“Çünki çips özü zərərli, arzuolunmaz qida sayılır. Qida Təhlükəsizliyi Agentliyi bu addımını davam etdirməlidir, bütün marka çipslərdə araşdırmaya başlamalıdır. İnsanlar da bilməlidir ki, çipslərin zərərsizi, xeyirlisi yoxdur. Bütün çipslər zərərlidir”.