Genetika elminin inkişafı ilə birlikdə insan tarixindəki ən dərin suallardan biri olan mənşə məsələsinə aydınlıq gətirilməyə başlanıb. Min illər boyu mədəniyyətlər və dini inanclar insanın yaradılışı barədə fərqli nəzəriyyələr irəli sürsə də, müasir elmi yanaşma insanın təkamül və genetik köklərini araşdırmaqla bu suala cavab verməyə çalışır.

“DogruXeber.tv” bu sahədə aparılan ən qədim və əhəmiyyətli genetik araşdırmaları bir araya gətirərək, bəşəriyyətin hardan gəldiyini izah edən son elmi nəticələri təqdim edir.

Aparılan genetik analizlərə görə, müasir insan – Homo sapiens – təxminən 200 min il əvvəl Şərqi Afrikada meydana çıxıb və oradan dünyanın müxtəlif bölgələrinə yayılıb.

“DogruXeber.tv” bildirir ki, bu məlumatlar insanın DNT-sindəki mitoxondrial izlər və Y xromosomu üzərində aparılan uzunmüddətli araşdırmalar nəticəsində əldə olunub. Xüsusilə, “mitoxondrial Həvva” adlandırılan genetik analizin nəticələri göstərir ki, hazırda yaşayan bütün insanların genetik izləri təxminən 150-200 min il əvvəl yaşamış bir qadına qədər izlənilə bilir. Bu, onun yeganə insan olduğu mənasına gəlmir, lakin bütün müasir insanların ancaq ondan gələn genetik xətt üzrə yaşadığı sübut edilir.

Eyni zamanda, Avropa, Asiya və Avstraliya bölgələrində tapılan qədim insan skeletlərinin genetik quruluşu, onların Afrika mənşəli müasir insanla qohumluğunu ortaya qoyub. Həmçinin Neandertal və Denisova kimi insanabənzər növlərlə genetik qarışıq olduğu da sübut edilib. Bu, insanın tək bir növ kimi formalaşmadığını, fərqli növlərin zamanla birləşərək indiki formaya gəldiyini göstərir. Bu nəticələr, insanın mənşəyinin yalnız coğrafi deyil, həm də genetik baxımdan nə qədər mürəkkəb və çoxşaxəli olduğunu sübut edir.