Prezident İlham Əliyevin ötən ilin sonunda - dekabrın 29-da işdən çıxardığı Nəsimi Rayon İcra Hakimiyyətinin sabiq başçısı Elxan İbrahimovun yerinə hələ yeni təyinat olmayıb.

"DogruXeber.tv" Musavat.com-a istinadən xəbər verir ki, İH-də hazırda iki müavin var.

Gülarə Verdiyeva və Zahid Xəlilov. Başçısının bir müavini-Ramiz Quliyev bir müddət əvvəl işdən çıxarıldığı üçün onun yerinə də hələ təyinat yoxdur. O cümlədən, İH baş mühasibi və köməkçisi vəzifələri də boşdur.

Gülarə Verdiyeva Zərdabi adına Pedaqoji İnstitutunu, sonra Prezident yanında Dövlət İdarəçilik Akademiyasının “Dövlət və Bələdiyyə İdarəetməsi” fakültəsini bitirib. İbtidai sinif müəllimi, direktor müavini və direktor vəzifəsində çalışıb. 2013-cü ildən Nəsimi rayon İcra Hakimiyyətində humanitar məsələlər üzrə müavin vəzifəsində, 2017-ci ilin fevral ayından Nəsimi rayon İcra Hakimiyyəti Başçısının birinci müavini vəzifəsində işləyir.

Zahid Xəlilov Azərbaycan Dövlət Pedaqoji İnstitutun bitirib. 1992-1996-cı illərdə Nəsimi Rayon İcra Hakimiyyətində, daha sonra Dövlət Əmlak Komitəsinin Nəsimi rayon şöbəsinin rəisi vəzifələrində çalışıb. 1999-2013-cü illərdə Nəsimi Rayon İcra Hakimiyyəti başçının müavini, 2013-2015-ci illərdə Nəsimi rayon İcra Hakimiyyətinin İctimai-siyasi və humanitar məsələlər şöbəsinin müdiri, 2015-ci ildən 2020-ci ilin dekabr ayınadək Nəsimi rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri vəzifəsində işləyib. 2020-ci ilin dekabr ayından Nəsiminin icra başçısının müavini vəzifəsində çalışır. YAP-ın ərazi partiya təşkilatının sədridir. Bildirilir ki, Z.Xəlilovun təcrübəsi nəzərə alınaraq, icra başçısının vəzifəsinin icrası ona tapşırılıb.

Yeri gəlmişkən, sabiq icra başçısı işləmiş E.İbrahimovla bağlı hüquq-mühafizə orqanlarında araşdırmalar başladığı haqda iddialar var. Mənbə Musavat.com-a deyib ki, bu araşdırmalar bundan əvvəl Kürdəmirdə icra başçısı işlədiyi dövrü də əhatə edə bilər. “Hələ ki araşdırmaların konkret istintaqa çevrilmədiyi deyilir, amma Elxan İbrahimovun iki dəfə ifadəsi alınıb” deyə, mənbə iddia edib.

Başqa bir iddiaya görə, sabiq icra başçısından təkcə rayon ərazisində fəaliyyət göstərən iş adamları şikayətçi olmayıb. Elxan İbrahimov Nəsimi Rayon İcra Hakimiyyətində vəzifə tutan əksər əməkdaşlardan ərizə yazıb könüllü şəkildə işdən getməyi tələb edib.(media.az). Onun işdən çıxmasını istədiyi şəxslərin siyahısında icra başçısının müavinlərinin, şöbə müdirlərinin, sektor müdirlərinin adları olub. Keçmiş başçı təyinatın ertəsi günü həmin şəxsləri ərizə yazmağa məcbur edib. Əməkdaşlar bu tələbə boyun əymədiyi üçün tərəflər arasındakı narazılıq qarşıdurma həddinə çatıb.

Hüquqşünaslar deyiblıər ki, Elxan İbrahimov barədə yayılan iddialar (100-200 min manat civarında qeyri-qanuni haqq tələbetmə) təsdiqini taparsa, bu, Cinayət Məcəlləsinin 311-ci maddəsi - rüşvət alma ilə cinayət tərkibi yaradır. Bu halda Elxan İbrahimova 12 ilədək azadlıqdan mərhumetmə cəzası verilə bilər.

E.İbrahimovla əlaqə saxlamaq cəhdləri nəticəsiz qalıb.