Son aylarda özəl tibb müəssisələrində göstərilən xidmətlərin qiymətlərində ciddi artım müşahidə olunur. Bu artım, xüsusilə aşağı və orta gəlirli ailələr üçün ciddi problemə çevrilib. Paytaxt Bakıda yerləşən bir çox özəl klinikada əvvəlcə 30-40 manat aralığında olan ilkin müayinələr hazırda 60-80 manat arasında dəyişir. Hətta bəzi hallarda sırf həkim qəbuluna düşmək üçün 100 manatdan çox məbləğ tələb olunduğu bildirilir.

"dogruxeber.tv"ın apardığı müşahidələrə əsasən, qiymət artımı ilə yanaşı, həkimlərin qəbullarına yazılmaq da çətinləşib. Bir çox vətəndaşlar yaxın günlər üçün boş yer tapmaqda çətinlik çəkdiklərini deyirlər. Xüsusilə uşaq həkimləri, nevropatoloq, ginekoloq və stomatoloq ixtisaslı mütəxəssislərə böyük tələbat var. Bu isə insanların sağlamlıq məsələlərini son ana qədər təxirə salmasına və bəzən problemin daha da ağırlaşmasına səbəb olur.

Bəzi ekspertlər qeyd edirlər ki, bu vəziyyət dövlət tibb müəssisələrindəki yüklənməni daha da artıracaq. Çünki vətəndaşların böyük bir qismi ödənişsiz xidmət almaq ümidi ilə dövlət xəstəxanalarına üz tutur, lakin burada da kifayət qədər həkim və ya tibbi avadanlıq çatışmazlığı müşahidə olunur. Üstəlik, dövlət sektorunda da həkimlərin bir çoxu əlavə qazanc üçün özəl klinikalarda çalışdıqları üçün səhiyyədə kadr çatışmazlığı daha kəskin hiss olunur.

"dogruxeber.tv" olaraq araşdırmalarımız davam edir və vətəndaşların müraciətlərinə əsaslanaraq məsələni gündəmdə saxlayacağıq.