DogruXeber.az: - Azərbaycanda bir müddət əvvəl heyvan bazarlarının bağlanması ət bazarında ciddi qiymət artımına səbəb olmuşdu.

Aradan bir neçə ay keçməsinə baxmayaraq, bəzi heyvan bazarları artıq fəaliyyətini bərpa etsə də, ətin qiymətində ucuzlaşma müşahidə olunmur. Bu vəziyyət isə ən çox alıcıların narazılığına səbəb olur.

Bazarlar bağlanmazdan əvvəl mal əti pərakəndə satışda 16-16,50 manat arasında təklif olunurdu. Lakin heyvan bazarlarının fəaliyyətinin dayandırılmasından sonra qiymətlər 17,50 manata qədər yüksəldi. Hazırda da bazarda eyni qiymət qorunub saxlanılır.

Daha baha olan quzu əti isə hazırda 20 manata satılır ki, bu da bir çox ailənin gündəlik alış-verişini çətinləşdirir.

Maraqlıdır ki, yerli ətin baha qalmasına baxmayaraq, bazarda xaricdən idxal olunan ətlər daha ucuz qiymətə təklif olunur. Belə ki, bəzi satış nöqtələrində idxal ətlərinin 12-14 manat aralığında satıldığı müşahidə edilir. Bu isə alıcıları seçim qarşısında qoyur: bahalı yerli ət, yoxsa daha ucuz idxal məhsulu.

Azərbaycan Qida Təhlükəsizliyi Agentliyi (AQTA) Baku.ws-in sorğusuna cavab olaraq bildirib ki, hazırda Azərbaycana bir sıra ölkələrdən heyvan əti idxal olunur:

“Ölkəyə Monqolustan, Ukrayna, Braziliya, Belarus, Argentina, Hindistan, Gürcüstan, Rusiya, eləcə də digər dövlətlərdən müxtəlif növ ət məhsulları gətirilir. Bu məhsullar müvafiq nəzarət prosedurlarından keçdikdən sonra daxili bazara buraxılır”.//tribuna.az