Dogruxeber.tv: - Nəsimi rayonu, 20 Yanvar küçəsində illərlə şəhərin nəfəsi olan ağacların yerində indi şüşə və daşdan “iaşə obyektləri” ucalır. Ağacların gövdəsinə söykənmiş divarlar, köklərinin üzərinə tökülmüş beton parçaları, sanki qanunsuzluğun rəsmini çəkir.

Bəs bu obyektlər necə ərsəyə gəlir?
Şəhərin ortasında, yaşıllıq zolağında, dövlət torpağında bu qədər açıq şəkildə tikinti aparmaq üçün ya kimsə çox “güclüdür”, ya da kimlərsə çox “görməzdir”.

Ekologiya və Təbii Sərvətlər Nazirliyi susur.
Nəsimi Rayon İcra Hakimiyyəti isə sanki bu küçədən xəbərsizdir. Halbuki hər addımda tikinti nəzarətinə, yaşıllıqların mühafizəsinə cavabdeh qurumların möhürləri, imzaları var.

Bu prosesdə Dövlət Şəhərsalma və Arxitektura Komitəsinin də məsuliyyəti birbaşa ortadadır.
Komitənin rəhbəri Anar Quliyev bu cür qanunsuz tikintiləri görməzdən gəlməklə, Prezidentin etimadından sui-istifadə etmiş kimi görünür.
Əgər şəhərin planlaşdırılmasına cavabdeh qurum bu cür hallara müdaxilə etmirsə, deməli, paytaxtın hər qarışında maraqlar və şəxsi mənafeyin izi var.

Vətəndaş haqlı olaraq soruşur:

Bu obyekti tikən kimdir?

İcazəni kim verib?

Və ən əsası, bu ağacların hesabına kimlər qazanır?


Bu, artıq bir ağacın yox olması deyil – bu, dövlət nəzarətinin yox olmasıdır.

Yaşıllıqlar kəsilir, amma bu qanunsuzluqlara göz yuman məmurlar hələ də “vəzifəsində boy atır”.
Görünür, şəhərin nəfəsi onların maraqlarına mane olur.

"DoğruXəbər.tv" olaraq bildiririk ki, bu məsələ ictimai əhəmiyyət daşıyır və aidiyyəti qurumlar – Dövlət Şəhərsalma və Arxitektura Komitəsi, Ekologiya Nazirliyi və Nəsimi Rayon İcra Hakimiyyəti – dərhal məsuliyyət daşımalıdır.

Çünki bir daha sübut olunur:
yaşılın yerində boz bina ucalırsa, orda qanunsuzluq hökm sürür.

Tərəflərin mövqeyini dinləməyə hazırıq.