İt və pişiklər insanlarla min illərdir birgə yaşayan heyvanlardır və onların bəzi davranışları bəzən elmi izahla çətin başa düşülür. Gecəyarısı boş otağa baxaraq hürmələri, heç nə olmayan yerə baxaraq miyoldamaları və ya qəfil qorxuya düşmələri bir çox insanı düşündürür: görəsən bu heyvanlar bizim görə bilmədiklərimizi görə bilirlərmi?

"DogruXeber.tv" bu mövzuda həm qədim inancları, həm də müasir müşahidələri araşdırıb.

Bir çox mədəniyyətdə xüsusilə itlərin və pişiklərin ruhları və cinləri görə bildiyinə inanılır. Misir mifologiyasında pişiklər müqəddəs hesab olunur və onların mənəvi varlıqları hiss etdiyi düşünülür. Qafqaz və Anadolu inanclarında isə itlərin gecə saatlarında görünməyən varlıqlara reaksiya verdiyi deyilir. Bəzi hallarda ev heyvanlarının sahibləri dünyasını dəyişdikdən sonra onların qarşısında qeyri-adi şəkildə davranmaları bu inancı daha da gücləndirib. "DogruXeber.tv" tərəfindən toplanmış bəzi şəxsi təcrübələrə görə, ev heyvanları sahibinin ölümündən sonra aylarla onun yatağının yanında gözləyib və ya gözə görünməyən bir varlığa qarşı qorxmuş kimi davranıb.

Bununla yanaşı, bəzi alimlər bu davranışların heyvanların yüksək eşitmə və iybilmə qabiliyyəti ilə əlaqədar olduğunu deyirlər. İnsan qulağının eşidə bilmədiyi yüksək tezlikli səsləri, ya da çox uzaqdan gələn qoxuları heyvanlar rahatlıqla hiss edə bilir. Lakin bu izah belə hər zaman müşahidə edilən hadisələrin məntiqi izahı ola bilmir. Bəzi hallarda heyvanların eyni anda qəribə davranışlar sərgiləməsi və bunu ardıcıl olaraq etmələri suallar doğurur. Nəticə olaraq, bu məsələ həm mistik inancların, həm də elmi baxışın kəsişdiyi sirli bir sahə olaraq qalır.