DogruXeber.tv: Samux Rayon İcra Hakimiyyəti Başçısının Samux şəhəri üzrə İcra Nümayəndəliyi "Elman” şirkəti ilə satınalma müqaviləsi imzalayıb.

Müqavilədə Samux şəhərində bir sıra yol və küçələrdə əsaslı təmir işləri nəzərdə tutulur. Təmir işlərinə görə şirkətə 615 449,34 manat ödəniləcək.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, "Elman” MMC 28 dekbar 2004-cü ildə qeydiyyata alınıb. Şirkətin nizamnamə kapitalı qeyd edilməyib. "Elman” MMC-nin hüquqi ünvanı Yevlax rayonu, Aran qəsəbəsində yerləşir. Şirkətin qanuni təmsilçisi Quliyev Zakir İbrahim oğludur.

Ondan əvvəl şirkəti Ələkbərov Namit Cəlal oğlu, daha əvvəl isə Süleymanov Elnur Talış oğlu təmsil edib. Bu şəxslərinin heç biri haqqında açıq mənbələrdə hər hansı məlumata rast gəlinmir. "Elman” MMC haqqında da məlumat yoxdur. Şirkətin maddi-texniki bazasının səviyyədə olduğu məlum deyil.

Bununla belə, Samux Rayon İcra Hakimiyyəti Başçısının Samux şəhəri üzrə İcra Nümayəndəliyi birqayda olaraq təmir və abadlıq işlərini bu şirkətə tapşırır. Ötən il qurumla şirkət arasında 387 786,78 manatlıq, 2023-cü ildə isə 298 901,32 manatlıq satınalma müqaviləsi imzalanıb. Hər iki müqavilədə yolların və küçələrin əsaslı təmiri nəzərdə tutulub.

Həmçinin 2023-cü ildə Samux Rayon İcra Hakimiyyəti ilə "Elman” MMC arasında abadlıq işləri ilə bağlı 213 944,68 manatlıq müqavilə imzalanıb.

Dövlət satınalmalarının vahid internet portalı üzərindən apardığımız araşdırma zamanı məlum olub ki, "Elman” MMC yalnız Samux Rayon İcra Hakimiyyəti və Samux Şəhər İcra Nümayəndəliyində sifarişlər alır. Bu da müəyyən şübhələr yaradır. Axı "Elman” MMC alternativssiz şirkət deyil. Azərbaycanda kifayət qədər populyar inşaat şirkətləri mövcuddur. Necə ola bilər ki, Samux Rayon İcra Hakimiyyəti və Samux şəhər İcra Nümayəndəliyinin tenderlərini yalnız "Elman” MMC qazanır? Bu sualın cavabı açıq qalır.

Samux Rayon İxra Hakimiyyətinin başçısı Firdovsi Əliyevdir. O. 2023-cü ildən Samuxa rəhbərlik edir. Təsadüfə baxın ki, "Elman” MMC də məhz Firdovsi Əliyev Samuxa icra başçısı təyin ediləndən sonra tenderlərdə qalib gəlməyə başlayıb.

Firdovsi Əliyev 1995-2000-ci illərdə deputat olub. 2002-ci ildə Ekologiya və Təbii Sərvətlər Nazirliyində Ekoloji Siyasət İdarəsinin rəisi və 2003-cü ildə Ekspertiza İdarəsinin rəisi işləyib. O, 2004-2023-cü ilədək isə ekologiya və təbii sərvətlər nazirinin müavini vəzifəsində çalışıb.

Firdovsi Əliyevin Samux şəhəri üzrə nümayəndəsi isə Elşad Qasımovdur. Bu şəxsin adı tender əməliyyatlarında hallanır. \\Qaynarinfo