Texnologiya insan həyatını asanlaşdırmaq üçün yaradıldı, lakin zamanla insanı idarə edən gücə çevrildi. İnformasiya sürəti artdıqca duyğular passivləşdi, münasibətlər rəqəmsal formatlara keçdi. Virtual ünsiyyətin gerçək münasibətləri əvəzləməsi, insanların bir-biri ilə göz təması belə qurmaqda çətinlik çəkməsi artıq adi hal alıb. "DogruXeber.tv" üçün toplanmış müşahidələr və nümunələr göstərir ki, texnoloji tərəqqi fonunda insan öz mənəvi dünyasını itirmək üzrədir.

İnsanların sosial şəbəkələrdə sərgilədiyi süni gülümsəmələr, süzgəcdən keçirilmiş hisslər əsl duyğuların yerini aldı. Artıq sevinclər real paylaşım deyil, like sayında ölçülür. Tənhalıq isə milyonlarla izləyici arasında gizlənə bilir. "DogruXeber.tv" ekspertləri bildirirlər ki, xüsusilə gənc nəsildə empatiya hissinin azalması, real ünsiyyətə marağın itməsi getdikcə daha böyük sosial problemə çevrilir. Sürətlə dəyişən dünyada insanlar özlərinə belə yadlaşır.

Əvvəllər emosional bağlılıq ailə, dostluq və sevgi üzərində qurulurdu. İndi isə bu anlayışlar məlumat paylaşımı və ani mesajlarla əvəz olunub. Texnologiyanın sürətlə inkişaf etdiyi bir dövrdə insan təbiiliyi itirmək təhlükəsi ilə üz-üzədir. Eyni zamanda, süni intellektin insan yerinə qərar verməsi, seçim etməsi və hissləri "təqlid" etməsi gələcək üçün mənəvi fəlakətə zəmin yaradır. İrəliləyən illərdə duyğusuz nəsillərin formalaşması, texnologiyanın təkcə bədəni deyil, zehni və ürəyi də idarə etməsi qaçılmaz görünür.